Report

Kedar ko…

images (1)

Kedar ji Bhojpuri bolte the aur Sanskrit ke bhi the mulniwasi. Mere praant ke Odia Muslims ka bhasha inhi do bhashaon ke pramukhta se ek hadhh tak standardised hai, aur is tarah wo aa gaye mere aatma ke bahat qareeb. Main unka pura naam islye nahi leta kyunke Kedar kahte huye lagta hai jaise dur kisi udyaan mein koi phal pak raha ho jiska naam hai Kedar. Ek shaam achanak se hua unki kavitaon ka saamna to main rone laga. Mujhe mil gaya tha mera aadmi jo rakh raha tha dhele, pathar, ghaans, gehun, nashwarta aur komal haathon jaisi chizon ka khayal. Main bichalit tha to socha Saket jaata hun, suna hai wahin rahte hain Kedar. Phir ye soch kar ruk gaya ke jaaunga to kahunga kya. Kedar mere hriday ke sabse vinamra hisse mein rahne lage the. Har din unko unki kavita mein milta raha aur kalpana karta raha ek qamre ka jahan wo ek kone mein baithe hain aur main apni kavita thithur kar suna raha hun ya wo hans kar mere dada ke tarah bol rahe hon, ‘coke pee le,sardi chali jayegi.’ Unki saari tasweerein dekhi, unke kaan the mere dadaji ke tarah. Unke haath bhi rahe honge mere dada ke tarah jo chute honge kaddu ko to purvanuman laga lete honge ke kab pakne wala hai. Unke payr bhi honge mere dada ke tarah jo chalte honge kheton mein to un raaston ko qadmon ki likhi panktiyan maante honge. Unki peeth bhi jhuki hui hogi mere dada ke tarah jo uth kar darwaze se dur maidaon mein drishti dauda kar chintion ke prajanan ke samay ka bhi anumaan laga leti hogi. Aaj aapke guzar jaane par soch raha hun ke wo saare gaaye jinke thanon se mitti ko tap kar upjaao hote aapne dekha unka kya hoga. AIIMS mein li hui aakhri saans jo aap kahte the aapki punji hai, us mein kaisi bhaanp hogi jo udaas patharon mein se aap ne nikalte dekha. Kedar, aap mujhe putrayogya maanein, aap itihaas mein jagah dein mujhko aapse banne walon mein, main ye shabd mere hostel ke ek qamre ke ashrudhaar se likh raha hun, aapse kabhi na mil paane par likh raha hun. Mera mann aur sankuchit hogaya hai ye soch kar ke phir aap jaise aur ek ko dhundunga kahan. Aapki kavitayein istihaar to nahi the jo kahin chipkayein jaayein, naare to nahi the ke kahin lagaye jaayein, chunaav to nahi the ke kahin jeete jaayein, baktabya to nahi the ya julus bhi nahi the ke nikaale jaayein. Aapki kavitayein gawah the mujh jaise karodon ka jo kabhi kabhi dil ki dhadkan insanon mein nahi paate hain to shahar ke bheed sadak mein ek budhiya ko paar karte dekh usi ko brahmand ka sabse bada khabar maan lete hain. Main aapka nibal uttardhikari hun. Main hun aapke naye kavi ka dukh, aapne baandha mujhe, aapne mujhe sikhaya ke jivan beetega shabdon se shabdon tak, jeene aur jeene aur jeene ke lagatar dwand mein. Aapne mujhko banaya us sukhe ped ke upar bache do chaar patton mein se ek jo aapke aaj jaane ke baad denge srishti par pehra.

Aaj aap uthe hain is prithvi se prithvi samet, jal-kachchap samet, mere sukun samet jo nischint hai ke aap zinda hain. Zinda bhaari pathar ke tarah mere kaandhe par jo mera agnikeerati mastak hai usme aap hamesha daudte rahenge. Aapko yaad karte huye main aaj aapka vidyarthi nahi, beta hun. Mujhe swikaar karein.

– S.M. Shafi
  B.A English Honours, Jamia Millia Islamia

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.